wo aksar mujhse milne aati hai…
aakar meri ungliyaan tatolti hai…
ek halki si ralak mehsus to hoti hai…
lekin uske hone ka ehsaas nahi hai…


main apni hi dhun me hun…
par wo mera haath pakad leti hai…
mujhe rokti hai, mujhe khinchti hai…
ab uske hone ka ehsaas hai, ek bechaini hai…

haath numb se ho jaate hain…
paanv kaanpte se hain…
main rukna chahta hun…
par manzil kaafi door hai…


wo khinch kar mujhe apni bahon me bhar leti hai…
main chah kar bhi kuch nahi kar paata…
paas aakar wo mere kaano me kuch kehti hai…
sine me kanpkanpi badhti jaati hai…


saansein tez hain, kampan abhi bhi hai…
main door jaana chahta hun, wo paas aana chahti hai
ye sardi aksar mujhe aise hi sataati hai…
sardi aksar mujhse milne aati hai…

Aksar… Ek khayaal…
Tagged on:     

Leave a Reply

This site uses Akismet to reduce spam. Learn how your comment data is processed.